Ils elements centrals che caracteriseschan la lirica da Jessica Zuan èn puspè preschents en quest’ovra: las relaziuns tranter ils umans, l’ir e turnar ed il spetgar. Auter che en ils emprims cudeschs tschertga l’autura ussa in linguatg pli direct, cun vers pli armonics ed equilibrads. Las poesias emprovan da reproducir las repetiziuns, la monotonia e l’impussibilitad da fugir da quai che ans spetga. Ellas reflecteschan il basegn da chapir schabetgs e dumondas e tschertgan parallelas cun las idillas dal passà.