Leontina Lergier-Caviezel

Staatstragende Autoren … Jeu hai bunamein pigliau tema igl emprem mument. Ina petga pil stadi! Forsa schizun in pilaster? Jeu, cun mes texts romontschs, corrispundel ualvess alla definiziun «staatstragend».  

Mo – tgi fuorma la finala il stadi? Nus tuts, il pievel entir. Sco persuna singula ni en gruppas. Ponderond ch’il singul scribent representa buca mo sesez enteifer il stadi, ch’el reflectescha el meglier cass era in ton dil sentir e patertgar dalla societad, lu daventa el, igl autur sco collectiv, in ver crap da cantun. Tonaton, sco autura romontscha resta il diember da lecturs ch’jeu sai contonscher, limitaus.  

Ch’in lungatg vegni denton screts e discurrius da paucs mellis ni da milliuns, la lavur da scribent resta la medema. Ei scrivan e fabuleschan. Relatan da vers schabetgs ni inventan historias. Pussibiliteschan a mets e schenai da sefar veseivels e plaidan per tals che han tema da s’exprimer. Auturs dattan veta a lur protagonistas e protagonists, scaffeschan dialogs denter glieud dagitg morta ni dattan il plaid a tala che ha en verdad mai existiu. Tgi scriva cun plema politica, tgi raguda neunavon il vargau e tgi dat in sguard el futur. Ei vegn retschercau e formulau, reflectau e fabulau. En favur dalla caussa ni perquei che scriver ei ina pissiun. Ils ins scrivan en tun moderau e beinvulent, auters senuspeschan buca da schar ora las greflas ni silmeins da dar ina furada.  

«La biala democrazia promova la litteratura» constattescha Nell Zink. Ella ha raschun. Ina dallas valurs fundamentalas dalla democrazia ha en mira la libertad da mintga singul d’astgar decider e disponer. Scadina e mintgin astga palesar siu meini. In luxus ch’ins sa strusch appreziar avunda, schazegia forsa pér lu, cu el maunca.  

Per scribents munta quella libertad in paradis. Che lubescha ad els da dar suatientscha a lur regl da scriver. Da prender a mauns temas heiclis e dubius, da trer a strada detagls meins plascheivels che vegnan bugen cuschentai. Lubescha da dar fuorma litterara a schabetgs che muentan e fatschentan.